Ambasadori Gjerman Jorn Rohde ka përgëzuar qëndrimin dhe kontributin e Qeverisë së Kosovës për të përmirësuar bashkëpunimin rajonal para takimit të Procesit të Berlinit.
“Të inkurajuar nga qëndrimi proaktiv i qeverisë kosovare për të përmirësuar bashkëpunimin rajonal përpara takimit të Procesit të Berlinit me vizat e vendit të tretë dhe kartat e identitetit që udhëtojnë në rajon”, shprehet ambasadori gjerman në Twitter.
Sipas zhvillimeve të fundit, mësohet se Qeveria Kurti 2 është zotuar të marrë pjesë në nismat rajonale vetëm si palë e barabartë. Mbështetur në programin qeverisës, Kosova do të përfaqësojë me profil të qartë dhe të pavarur interesat nacionale të vendit dhe qytetarëve të tij në formatet e ndryshme të bashkëpunimit rajonal. Imazhi i shtetit të Kosovës dhe prezenca e saj dhe e shqiptarëve në rajon duket se do të ketë një vizion të ri me qeverinë Kurti.
“Kontributi ynë do të jetë konstruktiv dhe do të synojmë njëkohësisht respektimin e normave ndërkombëtare. Republika e Kosovës e dëshiron bashkëpunimin rajonal. Mirëpo nevojitet një bashkëpunim pa diskriminim. Kjo vlen që nga njohja e dokumenteve tona shtetërore e deri te përfaqësimi i vendit tonë. Ashtu si Kosova është njohur nga shumica dërrmuese e shteteve anëtare të BE-së dhe NATO-s, po ashtu presim edhe respektimin e plotë të sovranitetit tonë nga shtetet e rajonit”, shkruan në programin qeverisës.
Sigurisht, ky bashkëpunim rajonal pritet që të ketë në thelb barazinë dhe njohjen reciproke midis shteteve dhe partnerëve ndërkombëtarë.
