Kryeministri i Kosovës, Albin Kurti ka komentuar takimin mes Ramës, Vuçiç dhe Zaevit mbajtur në kuadër të iniciativës “Ballkani i Hapur” duke thënë se problemi kryesor në Ballkanin Perëndimor është mos ballafaqimi i Presidentit të Serbisë me të kaluarën.
Sipas Kurtit, tregu i përbashkët që është edhe synimi kryesor i kësaj iniciative duhet të nënkuptoi demokratizim dhe sundim të ligjit në vendet tona, por kjo shtoi ai është e pamundur për sa kohë Serbia nuk e pranon të kaluarën pasi ka shkaktuar “katër luftëra në dekadën e fundit të shekullit 20”.
Lidhur me ndryshimin e emërtimit nga “Minishengen” në “Ballkan të Hapur”, kryeministri i Kosova tha se nuk është i entuziazmuar nga ky ndryshim, pasi ky emër nënkupton hapje ndaj ndikimeve ruse dhe kineze.
“‘Ballkani i Hapur’ ngjan më shumë si Ballkan i hapur për ndikimet nga Lindja, sidomos nga Federata Ruse dhe Kina, si dhe Ballkan i Hapur për autokracinë, korrupsionin, kriminelët e luftës, siç e dimë që vazhdojnë të jenë masivisht jo vetëm të lirë në Serbi, por jo pak prej tyre edhe në pushtet”, tha ai.
Ndërsa për marrëdhëniet ndërmjet Kosovës dhe Shqipërisë, Kurti u shpreh se ajo duhet të jenë marrëdhënie gjithnjë të mira dhe nuk duhet të përcaktohen “as nga kryeministri i Kosovës e as nga ai i Shqipërisë”.
Ai shtoi se dy vendet janë pjesë e një kombi dhe “qytetarët e të dyja vendeve i kanë marrëdhëniet vëllazërore, ndërkaq prej politikanëve, qofshin ato edhe prej kryeministrave si Edi Rama dhe puna ime mbetet vetëm ta përfaqësojnë këtë vullnet e interes të qytetarëve”.
I pyetur nga gazetarët për shkarkimin e mundshëm të ministres së Punëve të Jashtme Donika Gërvalla, ku u përgjigj shkurt “Jo”. Këto komente Kurti i bëri pasi mori pjesë në një bashkëbisedim me poetin Xhevdet Bajraj, në kuadër të Panairit të Librit.
